Fransiya prezidenti Emmanuel Makron kechki ovqat paytida milliy terma jamoa hujumchisi Kilian Mbappe bilan kelajagini muhokama qilmaganini aytdi.

27 fevral, seshanba kuni "PSJ" hujumchisi Qatar amiri Tamim bin Hamad Ol Soniyning davlat tashrifi munosabati bilan Yelisey saroyida tashkil etilgan rasmiy qabulda ishtirok etdi.

Avvalroq, 25 yoshli futbolchi kelasi yozda erkin agent sifatida "Real"ga o‘tishga rozi bo‘lgani xabar qilingandi.

“Bu kechki ovqat Mbappeni saqlab qolishga urinishmidi? Bo‘lishi mumkin emas. Bu masala muhokama qilinmagan, buni klub rahbariyatining ixtiyoriga qoldiraman”, — deya Makronning so‘zlarini keltiradi RMC Sport.

2023/24 yilgi mavsumda Mbappe “PSJ” safida 32 ta o‘yin o‘tkazib, 32 ta gol va 7 ta golli uzatmani amalga oshirgan.


Manba: www.aniq.uz