Moskvada Markaziy Osiyodan kelgan mehnat muhojirining o‘rtacha oylik maoshi 54,5 ming rublni tashkil etadi. Bu, taxminan, 597 dollar yoki 7,5 million so‘mga (5 mart kungi kurs bo‘yicha) teng. Bu haqda “Kommersant” xabar berdi.

O‘rtacha oylik maoshni aniqlash uchun Tojikiston, Qirg‘iziston va O‘zbekiston ishchilari o‘rtasida so‘rov o‘tkazildi. Unda 18 yoshdan 60 yoshgacha bo‘lgan 900 nafar muhojir ishtirok etdi. Migrantlarning yarmidan ko‘pi maoshini konvertda oladi, yarmidan sal kamrog‘i esa to‘rt kishi bo‘lib ijaraga olingan xonada yashaydi va deyarli to‘rtdan biri hech qanday tibbiy yordam olmaydi.

Migrantlarning 54,4 foizi ish haqini naqd pulda, ko‘pincha rasmiy ro‘yxatdan o‘tmasdan, 30 foizga yaqini esa bank kartalari orqali olishi aniqlangan. O‘rtacha daromad oyiga 54,5 ming rublni tashkil qiladi.

O‘zbekistonliklar qurilishda (25 foiz), tojikistonliklar esa kimyoviy tozalash, sartaroshlik va boshqa xizmatlarda (31,8 foiz) ishlaydi. Savdo sohasida O‘zbekiston fuqarolarining atigi 5 foizi, Tojikiston va Qirg‘iziston fuqarolarining 12 foizi mehnat qiladi.

Xorijiy ishchilarning 44 foizi birga ijarada yashaydi, odatda bitta xonada to‘rt kishi, ulardan faqat 4,3 foizi o‘z xonasiga ega. Respondentlarning yarmi yashash joyi bo‘yicha ro‘yxatdan o‘tish uchun norasmiy ravishda to‘lashini tan oldi.

Muhojirlarning atigi 3,7 foizi pulli tibbiy sug‘urtaga ega, yarmiga yaqini esa faqat favqulodda holatlarda, deyarli chorak qismi esa umuman tibbiy yordamga murojaat qilmaydi.
Manba: www.aniq.uz