Britaniya harbiylari janubdagi Plimut port shahrida topilgan Ikkinchi jahon urushi davrida portlamay qolgan bombani keyinchalik utilizasiya qilish uchun xavfsiz tarzda dengizga tashladi.

Polisiyaning ma’lum qilishicha, 1940 yilning iyulida nemis bombardimonchilari nishonga olgan Plimutdagi uyning bog‘ida 500 kilogrammli bomba topilgan.

Uy atrofidagi xavfsizlik kordoni olib tashlandi va evakuasiya qilingan aholiga uylariga qaytishga ruxsat berildi.

Mahalliy OAV ma’lumotlariga ko‘ra, operasiya doirasida avvalroq Keyxem va Devonport qismlarining 10 ming aholisi evakuasiya qilingan.

Bomba tashlangan hudud atrofida 300 metr uzunlikdagi kordon yaratildi. Portlamagan bomba shahar ko‘chalari bo‘ylab 2,3 kilometr masofaga olib o‘tilgan. Poyezdlar va avtobuslar harakati to‘xtatildi.

Bu Ikkinchi jahon urushidagi portlamay qolgan nemis bombasini olib tashlash bo‘yicha eng yirik operasiyalardan biri ekanligi ma’lum qilingan.
Manba: www.aniq.uz