Kecha hamyurtimiz Nodirbek Abdusattorov qora donalarda polshalik Mateush Bartelga qarshi dona surdi va o‘yinning 40-yurish holatida raqibi taslim bo‘lganini tan oldi. Bu esa mahoratli shaxmatchimizning musobaqada 4 ochkoga ega bo‘lishini ta’minladi. Ushbu yutuq Abdusattorovni 10 nafar eng kuchli shaxmatchi ishtirok etayotgan “Prague International Chess Festival-2024” turnirining yetakchisiga aylanishiga olib keldi.

Bugun, 3 mart kuni xalqaro turnir nizomiga muvofiq ishtirokchilar uchun dam olish kuni etib belgilangan.

Ertaga, 4 mart kuni o‘tkaziladigan 6-tur o‘yinlarida Nodirbek Abdusattorov oq donalarda hindistonlik Praggnanandxaaga qarshi harakat qiladi.

Shu o‘rinda aytish lozim, Xalqaro shaxmat federasiyasi tomonidan mart oyi uchun e’lon qilingan eng kuchli shaxmatchilar reytingida Nodirbek 11-pog‘onadan joy egallagan bo‘lsa, norasmiy onlayn shaxmat reytingida “Prague International Chess Festival-2024”dagi ko‘rsatkichlari hisobiga kuchli beshlikni band etib turibdi.

Eslatib o‘tamiz, 9 turdan iborat mazkur shaxmat bahslari 7 martga qadar davom etadi.


Manba: www.aniq.uz